E’ asciuto ‘o sole, e nu tappeto d’oro
Tutto ‘e rubbine e perne arricamato,
Ha stiso, ascenno, ngopp’ ‘o vasulato
E ha fatto cchiù bellella ‘sta città.
‘E sciure ‘arancio, ‘e rrose, ‘e margarite
Ridene ncopp’ ‘e mmure d’ ‘e ciardine
E nu profumo caro, fine fine,
Quanta suspire ca te fa jettà !…
‘O cielo è calmo, calmo e armoniuso,
Cu n’aria ca se fricceca e cunzola;
E nu pensiero ‘e pressa se nne vola
A Ggiesù Cristo p’ ‘o ringrazià.
Nu ruscignuolo giovene, in amore,
S’affaccia ‘a miezo a ll’arbere e ce ‘ntona
Appassonata e bella, ‘na canzona
Che ‘mpietto l’allegria ce fa scetà.
Post Views:
2.275